صراط عشق صراط عشق
سربراہ مجلس وحدت مسلمین پاکستان نے فلسطین مارچ کے شرکاء سے خطاب کرتے ہوئے کہا کہ دنیا کے فرعون غزہ پر حملہ آور ہیں، خدا چاہتا ہے مظلومین ظلم کے مقابلے میں فریاد بلند کریں۔
مہر خبررساں ایجنسی کی رپورٹ کے مطابق، مجلس وحدت مسلمین پاکستان جنوبی پنجاب اور آئی ایس او پاکستان کے زیر اہتمام آزادی فلسطین مارچ علی چوک، حسین آگاہی سے ہوتا ہوا گھنٹہ گھر چوک پر جلسے کی شکل اختیار کر گیا، مارچ میں منہاج آلقران، متحدہ موومنٹ پاکستان و دیگر سیاسی و مذہبی جماعتوں کے قائدین سمیت ہزاروں کی تعداد میں عوام کی شرکت۔
سربراہ جمیعت علمائے اہلحدیث ضیاء اللہ شاہ بخاری نے خطاب کرتے ہوئے کہا کہ اسرائیلی سفاکیت کو روکنے میں جہاں عالمی برادری ناکام ہے وہاں اسلامی ممالک اور عرب لیگ بھی مکمل خاموش تماشائی بنے ہوئے ہیں، آج جس طرح فلسطینی عوام کا قتل عام ہو رہا ہے حق بنتا تھا کہ تمام کلمہ گو متحد ہو کر اسرائیل کو واضح اور جرآت مندانہ پیغام دیتے، جنگ بندی کی قرارداد کو امریکہ کا ویٹو کرنا مسلم حکمرانوں کے منہ پر تماچہ ہے۔
وائس چیئر مین ایم ڈبلیو ایم علامہ سید احمد اقبال رضوی نے مارچ سے خطاب میں کہا پاکستان کے حکمران اسرائیل نارملائزیشن کی شیطانی چالوں سے باز رہیں، ریاست صرف فلسطین ہے دو ریاستی فارمولہ مسترد کرتے ہیں، امریکہ کا تسلط دنیا پر کمزور ہو چکا ہے، دنیا کی مزاحمت اور بیداری نے امریکی ہیبت کو توڑ دیا ہے، اس وقت دنیا میں تمام قومیں فلسطین کے ساتھ ہیں جبکہ حکمران طبقہ اسرائیل کی پشت پر نظر آتا ہے، آزادی فلسطین قریب ہے اور اسرائیل نابود ہو کر رہے گا۔
ایم ڈبلیو ایم کے جنرل سیکرٹری سید ناصر عباس شیرازی نے کہا یہاں موجود بچے فلسطین کے بچوں کے ساتھ کھڑے ہیں، ملت پاکستان مظلومین فلسطین کو کبھی تنہا نہیں چھوڑیں گے، گریٹر اسرائیل کا منصوبہ خاک میں مل گیا ہے،انسانی حقوق کے علمبراد کہلانے والے درندوں۔سے بھی بدتر نکلے، امریکی، امریکی اور یورپ کا چہرہ بے نقاب ہو گیا ہے، فلسطینوں پر سلام ہو جنہوں نے یورپ و امریکہ کا اصل چہرہ دنیا کے سامنے آشکار کر دیا، ساٹھ دنوں کہ جنگ نے ثابت کیا مزاحمت مظبوط ہے، ان تمام بچوں عورتوں مردوں۔کو سلام پیش کرتے ہیں جو فلسطینوں کے لئے یورپ و امریکہ میں نکلے، پاکستان میں اسرائیل کے حق میں بیانیہ بنانے والے نظریہ پاکستان کے مخالف ہیں۔
جنوبی پنجاب کے صوبائی صدر علامہ سید اقتدار حسین نقوی نے کہا کہ ہم اہل غزہ کے مظلومین کے ساتھ کھڑے ہیں، آج انسانی حقوق کے عالمی دن کے موقع پر بھی دنیا کے نام نہاد حقوق انسانی کے نام نہاد دعویٰ داروں نے مجرمانہ خاموشی اختیار کر رکھی ہے، امریکہ اسرائیل کی درندگی کی کھل کر حمایت کر رہا ہے عالم اسلام کا کردار مایوس کن ہے۔
