حرم امام رضا علیہ السلام کے متولی سے شیخ ابراہیم زکزاکی کی ملاقات

  آستان نیوز کے حوالے سے نقل کیا ہے کہ حجۃ الاسلام والمسلمین احمد مروی نے آج نائجیریا کی اسلامی تحریک کے سربراہ اور ان کے اہلخانہ سے مشہد مقدس میں ہونے والی ملاقات کے دوران اظہار خیال کرتے ہوئے کہا کہ افریقی عوام کی روحانیت و معنویت اور انسانی و الہیٰ اقدار کی طرف راہنمائی کرنے اور اسی طرح ان کی تعلیم و تربیت میں جناب شیخ زکزاکی کا بنیادی کردار بہت زیادہ نمایاں ہے۔

انہوں نے اس بیان کے ساتھ کہ دین کی تبلیغ کرنے والے مجاہدوں کے لئے جناب شیخ زکزاکی کی کوشش اور صبر واستقامت ایک نمونہ ہے، کہا کہ آپ نے آفریقہ میں جہاد، اسلام اور امت مسلمہ کے درمیان اتحاد و یکجہتی کا پرچم بلند کیا۔

حرم امام رضا(علیہ السلام) کے متولی نے فلسطین میں پیش آنے والے حالیہ واقعات کا ذکر کرتے ہوئے کہا کہ غاصب صیہونی حکومت کے توسط سے ان دنوں غزہ میں مظلوم فلسطینیوں کے خلاف جو انسانی المیہ رونما ہو رہا ہے، وہ حقیقی معنوں میں انسانیت کے خلاف ایک ایسا جرم ہے جس سے قومیت، نسل، مذہب اور مسلک سے بالاتر ہو کر ہر با انصاف انسان کے دل کو تکلیف پہنچی ہے۔

انہوں نے کہا کہ مظلوم فلسطینیوں کے خلاف امریکہ اور یورپی ممالک کی اسرائیلی جرائم کی حمایت انسانی حقوق کی صریح خلاف ورزی ہے، فلسطینیوں کی نسل کشی اور اسرائیل کی جانب سے غزہ کی غیر قانونی ناکہ بندی کے خلاف خاموشی گویا انسانیت کا ضمیر مرچکا ہے۔

حجت الاسلام والمسلمین مروی نے آیہ شریفہ’’ أَلَيْسَ الصُّبْحُ بِقَرِيبٍ‘‘ کی تلاوت کرتے ہوئے کہا کہ ہم حق اور اسلام ناب کی فتح کےلئے پرامید ہیں۔ غزہ کی بےدفاع عوام کے خلاف صیہونیوں کے جرائم درحقیقت ان کے خوف اور مایوسی کی وجہ سے ہیں کیونکہ وہ اپنے آپ کو تباہ ہوتے دیکھ رہے ہیں۔

ملاقات کے دوران نائجیریا کی اسلامی تحریک کے سربراہ اور رہنما شیخ ابراہیم زکزاکی نے آستان قدس رضوی کی میزبانی کو سراہتے ہوئے کہا کہ میں خداوند متعال کا شکر ادا کرتا ہوں کہ مجھے حضرت امام علی رضا علیہ السلام کی زیارت کرنے کا موقع ملا ،امام رضا(علیہ السلام) کائنات میں اللہ کی رحمت و رأفت کا مظہر ہیں اور یہ نورانی بارگاہ انسان کے لئے باعث سکون اور دکھوں کو دور کرنے کی جگہ ہے۔