صراط عشق صراط عشق
مجلس وحدت مسلمین پاکستان کے مرکزی رہنما نے کہاکہ کربلا تمام عالم انسانیت کے لئے نجات اور فلاح کا پیغام ہے۔ انہوں نے کہا کہ عزاداری امام حسین علیہ السلام ہمارا بنیادی آئینی حق ہے.
مجلس وحدت مسلمین پاکستان کے مرکزی عزاداری کونسل کا اہم اجلاس مرکزی سربراہ عزاداری کونسل علامہ مقصود علی ڈومکی کی زیر صدارت منعقد ہوا۔ آن لائن اجلاس میں عزاداری کونسل صوبہ پنجاب خیبر پختونخواہ بلوچستان آزاد کشمیر اور جنوبی پنجاب کے صوبائی مسؤلین نے محرم الحرام میں عزاداری کونسل کی فعالیت اور ایام عزا کے حوالے سے مسائل کے حوالے سے اپنی رپورٹس پیش کیں۔
اس موقع پر گفتگو کرتے ہوئے علامہ مقصود علی ڈومکی نے کہا کہ محرم الحرام نواسہ رسول حضرت امام حسین علیہ السلام اور ان کے اصحاب باوفا کا مہینہ ہے جنہوں نے اپنی لازوال قربانی کے ذریعے دین اسلام کی بقاء کا انتظام کیا۔ کربلا تمام عالم انسانیت کے لئے نجات اور فلاح کا پیغام ہے۔ انہوں نے کہا کہ عزاداری امام حسین علیہ السلام ہمارا بنیادی آئینی حق ہے۔ جس پر قدغن اور پابندی کسی صورت قبول نہیں۔ عزاداری جلوس عزا اور مجالس عزا عظیم عبادت ہیں جو کسی پرمٹ کے محتاج نہیں۔
انہوں نے کہا کہ مجلس وحدت مسلمین کے زیر اہتمام صوبے اور اضلاع کی سطح پر عزاداری کانفرنسز منعقد کی جائیں گی جس میں علماء کرام ذاکرین عظام بانیان مجالس پرمٹ ہولڈرز اور ماتمی دستوں کے ذمہ داران شریک ہوں گے۔
انہوں نے وفاقی اور صوبائی حکومتوں سے مطالبہ کیا کہ وہ ایام عزا کے مسائل کے حوالے سے فوکل پرسن مقرر کرتے ہوئے عزاداری کے انعقاد میں حکومتی تعاون کو یقینی بنائے۔ امن و اتحاد کے داعی علماء و ذاکرین پر بے جا پابندیاں اور عزاداروں پر مقدمات جیسے منفی اقدامات سے گریز کرے۔
